شكشكة
الموت

مش لازم تمشى فى كل الجنازات
الموت متربص فوق كل العمارات
وعلى منصات المؤتمرات والندوات
نافش ريشه بيفتى فى مصير الطير
متخفى ف اشكال الوان وقصايد
وجرايد ومقالات .. وفواتير
داخل فى جداول دورى الكوره والانتخابات
فى نشرات البورصه وراقد ع الارصفه تحت البلكونات
فى نوت المزيكه وعربيات الدرجه التالته
فى اجتماعات القمه وجنازير الدبابات
الموت بقى له رجلين واسنان حداثيه
واخد شكل الموت العادى – الهادى
رغم الضجه الثقافيه وخلل المخابيل البهاليل
وطنى ومستورد شكله جميل
بيبدع فى مواويل العشق
الموت واخد شكل النيل
بيرطن بسبع تلسن ولغات عاميه وفصحى
وبكافه لهجات التراتيل
له قوه بطش الهجانه ولصوص الليل
وبيملك رقه احاسيس الادمى الذوق
بيشاركنى العشا – كاس البيره وطبق الكشرى